નવી દિલ્હી, તા. 29 : ભારતીય ક્રિકેટ
કન્ટ્રોલ બોર્ડ (બીસીસીઆઈ)એ મહિલા પ્રીમિયર લીગ 2026નું સમયપત્રક જારી કરી દીધું છે. ડબલ્યુપીએલની ચોથી સીઝન નવ
જાન્યુઆરીથી પાંચમી ફેબ્રુઆરી સુધી રમાશે. આ મુકાબલા મુંબઈ અને વડોદરામાં થવાના છે.
સીઝનની આરંભિક મેચ નવી મુંબઈમાં થશે. જેમાં મુંબઈ ઈન્ડિયન્સની ટક્કર રોયલ ચેલેન્જર્સ
બેંગલોર સાથે થશે. નવથી 17 જાન્યુઆરી
સુધી ચાલનારી નવી મુંબઈ લેગમાં કુલ 11 મેચ રમવામાં આવશે. પાંચમી ફેબ્રુઆરીના વડોદરામાં ફાઈનલ મેચ રમાશે.
બાદમાં લીગ વડોદરા શિફ્ટ થઈ જશે. જેમાં પ્લેઓફ સહિત બાકીના 11 મેચ રમાશે. વડોદરા લેગમાં પહેલી
મેચ ગુજરાત જાયન્ટસ અને રોયલ ચેલેન્જર્સ બેંગલોર વચ્ચે થશે. બાદમાં દિલ્હી કેપિટલ્સ
અને મુંબઈ ઈન્ડિયન્સ વચ્ચે ટક્કર થશે. જે 2025ના ફાઈનલની રીમેચ હશે. 1 ફેબ્રુઆરી સુધી લીગ મેચ ચાલશે. બાદમાં એક દિવસનો બ્રેક લેવામાં
આવશે. એલિમિનેટર ત્રણ ફેબ્રુઆરી અને ફાઈનલ પાંચમી ફેબ્રુઆરીના રોજ રમાશે. ટેબલ ટોપર
ટીમ સીધી ફાઈનલમાં પહોંચશે. જેમાં એલિમિનેટરની વિજેતા ટીમ સામે ટક્કર થવાની છે. એલિમિનેટર
મેચ ટેબલમાં બીજા અને ત્રીજા નંબરે રહેનારી ટીમ વચ્ચે રમાશે. ઉલ્લેખનીય છે કે, ડબલ્યુપીએલમાં મુંબઈ ઈન્ડિયન્સ વર્તમાન ચેમ્પિયન
છે અને અત્યારસુધીમાં રમાયેલી ત્રણ સીઝનમાથી બે ખિતાબ જીત્યા છે. એક વખત રોયલ ચેલેન્જર્સ
બેંગલોરે મુકાબલો જીત્યો છે. દિલ્હી કેપિટલ્સ ત્રણ સીઝનમાં રનર અપ રહી છે. જ્યારે ગુજરાત
અને યુપીની ટીમ એક પણ વખત ફાઈનલ સુધી પહોંચી શકી નથી.
