રાંચી, તા. 29 : દક્ષિણ આફ્રિકા સામે ટેસ્ટ
શ્રેણીમાં 0-2થી સુપડા સાફ થયા બાદ હવે ટીમ
ઈન્ડિયા વનડે શ્રેણી રમવા ઉતરી રહી છે. ત્રણ મેચની શ્રેણીનો પહેલો મુકાબલો રવિવારે
રાંચીના ઝારખંડ સ્ટેટ ક્રિકેટ એસોસિયેશન ઈન્ટરનેશનલ ક્રિકેટ સ્ટેડિયમમાં રમાશે. ભારતની
પ્લેઈંગ 11 પહેલા વનડે માટે લગભગ નક્કી
માનવામાં આવી રહી છે. શુભમન ગિલની ગેરહાજરીમાં કેએલ રાહુલ શ્રેણીમાં ટીમની કમાન સંભાળી
રહ્યો છે. તેવામાં રાહુલ વિકેટકીંિપંગ કરતો પણ જોવા મળશે. ગિલ ન હોવાના કારણે રોહિત
શર્મા સાથે ઓપનિંગમાં યશસ્વી જયસ્વાલ જોવા મળી શકે છે. રોહિત અને યશસ્વીની ઓપનિંગથી
રાઈટ-લેફ્ટનું કોમ્બિનેશન પણ જળવાઈ રહેશે. નંબર ત્રણ ઉપર વિરાટ કોહલીનું રમવું નક્કી
છે. શ્રેયસ અય્યર ઈજાગ્રસ્ત છે. તેવામાં તેના નંબર ચાર ઉપર ઋતુરાજ ગાયકવાડ, તિલક વર્મા અને ઋષભ પંત છે. પોઝિશન છ ઉપર પણ
ત્રણ ખેલાડી દાવેદાર છે. જો કે નંબર ચાર ઉપર રમવા માટે ઋતુરાજ ગાયકવાડને પ્રાથમિકતા
આપવામાં આવી શકે છે. લગભગ કેએલ રાહુલ જ વિકેટકીપિંગ કરશે. જો પંત રમશે તો તેને બેટ્સમેન
તરીકે ઉતરવું પડશે. નંબર પાંચ ઉપર કેએલ રાહુલ આવી શકે છે. કુલ મળીને લાગી રહ્યું છે
કે નંબર ચારથી છ સુધી ખેલાડીઓની પોઝિશન મેચની સ્થિતિ અને બીજી ટીમના બોલિંગ આક્રમણને
ધ્યાને રાખીને ફેરફાર થઈ શકે છે. રવીન્દ્ર જાડેજાનું પણ ટીમમાં રમવું નક્કી છે. જ્યારે
વોશિંગ્ટન સુંદર કે નીતિશ રેડ્ડીમાંથી કોને તક મળશે તે જોવાનું રહ્યું. કુલદીપ યાદવ
ટીમમાં સ્પેશિયાલિસ્ટ સ્પીનર તરીકે રમશે. ફાસ્ટ બોલિંગની કમાન હર્ષિત રાણા અને અર્શદીપના
હાથમાં રહેશે. જસપ્રીત બુમરાહ અને મોહમ્મદ સિરાજને આરામ આપવામાં આવ્યો છે. રાંચી સ્ટેડિયમની
પીચ સ્પીનર માટે મદદરૂપ માનવામાં આવે છે. જો કે પીચ ઉપર ઘાસ રહેશે તો એક પેસ બોલિંગ
ઓલરાઉન્ડર નીતિશ રેડ્ડીની જગ્યા બની શકે છે. રાંચીની પિચ સામાન્ય રીતે ધીમી છે. તેવામાં
હાઈ સ્કોરિંગ ગેમની આશા ઓછી છે. આ મેદાનમાં છમાંથી ત્રણ મેચ ચેઝ કરનારી ટીમ જીતી છે.
પહેલા બેટિંગ કરતા એવરેજ સ્કોર 265 છે. જે મોર્ડન ક્રિકેટ અનુસાર ઓછો છે. ભારત અને દક્ષિણ આફ્રિકા
વચ્ચે અત્યારસુધીમાં 94 વનડે રમાઈ
છે. જેમાંથી 51 મેચ દક્ષિણ આફ્રિકાએ જીતી છે.
જ્યારે ભારતે 40 જીત મળી છે.
