વેલિંગ્ટન ટેસ્ટમાં ઈંગ્લેન્ડનો દબદબો

વેલિંગ્ટન, તા. 7 : ઈંગ્લેન્ડ અને ન્યૂઝીલેન્ડ વચ્ચે વેલિંગ્ટનમાં  બીજી ટેસ્ટ મેચમાં ઈંગ્લેન્ડ ન્યૂઝીલેન્ડ ઉપર ખૂબ જ ભારે પડી રહ્યંyં છે. પહેલી ઇનિંગમાં 280 રન કર્યા બાદ ન્યૂઝીલેન્ડની ટીમને ઈંગ્લેન્ડે 125 રનમાં ઓલઆઉટ કરી દીધી હતી, જેમાં ગસ એટકિંસન અને બ્રાયડન કાર્સે ચાર ચાર વિકેટ લીધી હતી. બાદમાં બીજો દાવ શરૂ કરતા ફરીથી મક્કમ બેટિંગ જોવા મળી હતી અને બીજા દિવસની રમતના અંત સુધીમાં જ ઈંગ્લેન્ડે 533 રનની સરસાઈ મેળવી હતી. ઈંગ્લેન્ડની 280 રનની ઇનિંગ સામે ન્યૂઝીલેન્ડની ટીમ 125 રનમાં જ ઓલઆઉટ થઈ હતી. ઇંગ્લેન્ડ તરફથી પાંચ ખેલાડી બેવડા આંક સુધી પણ પહોંચી શક્યા નહોતા અને તેમાં ત્રણ તો ઝીરોમાં પેવેલિયન પરત ફર્યા હતા. કિવી ટીમ તરફથી સૌથી વધારે 37 રન કેન વિલિયમ્સે કર્યા હતા. ઉપરાંત ટોમ બ્લન્ડેલ અને ગ્લેન ફિલિપે 16-16 અને લાથમે 17 રન કર્યા હતા. ઈંગ્લેન્ડ તરફથી ગસ એટકિંસને ચાર વિકેટ લીધી હતી. જેમાં હેટ્રિક પણ સામેલ છે, જ્યારે બ્રાયડન કાર્સે પણ ચાર લીધી હતી. કિવી ટીમને સસ્તામાં ઓલઆઉટ કર્યા બાદ ઈંગ્લેન્ડે ઝેક ક્રાઉલીની વિકેટ ઝડપથી ગુમાવી હતી. બાદમાં બેન ડકેટ અને જેકો બેથેલે બાજી સંભાળી હતી પણ બંને સદીથી ચૂક્યા હતા. ડકેટ 92 રને અને બેથેલ 96 રને આઉટ થયો હતો, જ્યારે હેરી બ્રુક 55 રન કરીને આઉટ થયો હતો. બીજા દિવસની રમતના અંત સુધીમાં જો રૂટ 73 રને અને બેન સ્ટોક્સ 35 રને નોટઆઉટ પરત ફર્યા હતા.