માંડવી, તા. 29 : નગરપાલિકા ખાતે કારોબારી સમિતિની
બેઠક મળી હતી. જેમાં વિવિધ વોર્ડમાં પ્રાથમિક સુવિધાઓ જેવી કે રોડલાઇટ, પાકા રસ્તા અને અન્ય વિકાસનાં કામોને બહાલી
અપાઇ હતી. કારોબારી ચેરમેન વિશાલ ઠક્કરના અધ્યક્ષ સ્થાને મળેલી બેઠકમાં 15મા નાણાપંચ ટાઇડ ગ્રાન્ટ વર્ષ 2022-23 અન્વયે શહેરના વિવિધ વિસ્તારોમાં
રોડલાઇટ માટે કેબલ લગાવવા, સ્વર્ણિમ જયંતી
મુખ્યમંત્રી શહેરી વિકાસ યોજના ગ્રાન્ટ વર્ષ 2025-26 અન્વયે અનંત દ્વારથી બંદર રોડ, ફોરેસ્ટ ઓફિસથી અયોધ્યા નગરનાં પાટિયા સુધી,
આઝાદ ચોકથી જૂની ઘાસચારા માર્કેટ સુધી, ટાગોર રંગભવનથી
મહિલાબાગ સુધી, સૂર્યનારાયણ મંદિરથી નાગનાથ મંદિર સુધી તેમજ અન્ય
વિસ્તારોમાં રોડલાઇટનાં કામોને મંજૂર કરાયાં હતાં. સ્વચ્છ ભારત મિશન 2.0 અંતર્ગત ડમ્પિંગ સ્ટેશન પર
પ્રોસેસિંગ પ્લાન્ટ માટે સિવિલ વર્કની કામગીરી માટે ઓફિસ રૂમ, સિકયોરિટી રૂમ, રિટાયરિંગ
રૂમ તેમજ સૂકા અને ભીના કચરાના પ્રોસેસિંગ માટે શેડ અને લેગેસી વેસ્ટના નિકાલ માટેનાં
કામને બહાલી તેમજ યુ.ડી.પી.-88 ગ્રાન્ટ અંતર્ગત ડિસીલ્ટિંગ મશીન ખરીદી માટે મંજૂરી અપાઇ હતી.
તદુપરાંત જુદા જુદા વિસ્તારોમાં પાણીની લાઇનો
સિમેન્ટ, ક્રોંકિટ રસ્તા,
અગ્નિશામક વાહન, ભૂગર્ભ ગટર સફાઇકામ માટે જેટિંગ
મશીન, રોડલાઇટ રિપેરિંગ માટે હાઇડ્રોલિક વાહન ખરીદવા મંજૂરી અપાઇ
હતી. આ બેઠકમાં કારોબારી સદસ્ય વિજયભાઇ ચૌહાણ, વિજયભાઇ ગઢવી,
જશુબેન હાલાઇ, પ્રેમજીભાઇ કેરાઇ, જયશ્રીબેન વાસાણી તથા સેનિટેશન ઇન્સ્પેક્ટર મનજીભાઇ પરમાર, ચેતનભાઇ જોશી, વિપુલ ઝાલા, મયૂરસિંહ
ઝાલા, હરપાલસિંહ ગઢવી, દેવીયાન ગઢવી,
હરિ ગઢવી, હિતેશ મુછડિયા, ભૂપેન્દ્ર સલાટ, સાવનસિંહ રાઠોડ, પ્રકાશ પરમાર વિ. ઉપસ્થિત રહ્યા હતા.
