અંજારમાં જૈન સમાજ દ્વારા આયોજિત કાર્યક્રમમાં તપસ્વીઓનું કરાયું સન્માન

અંજાર, તા. 28 : અહીંના જૈન સોશિયલ ગ્રુપ દ્વારા અંજારમાં રહેતા ગ્રુપના સભ્યોનાં બાળકો માટે સરસ્વતી સન્માન સમારંભ યોજાયો હતો. વિદ્યાર્થીઓમાં શિક્ષણ પ્રત્યે રુચિ વધી તેવા ઉમદા ઉદ્દેશ સાથે તેજસ્વી વિદ્યાર્થીઓને ઈનામ આપી સન્માનવામાં આવ્યા હતા. ઈનામ વિતરણના દાતા જિજ્ઞેશભાઈ દોષી પરિવાર (મહાવીર ડેવલોપર્સ) રહ્યા હતા. ઐતિહાસિક અંજાર શહેરમાં સને 2081ના ભવ્ય ચાતુર્માસમાં આચાર્ય યશોવિજયજી સૂરિસ્વરજી આદિઠાણા-પના સાંનિધ્યમાં સિદ્ધિતપનું આયોજન કરવામાં આવ્યું હતું, જેમાં  45 દિવસનાં તપમાં 37 ઉપવાસ અને આઠ બ્યાસણા કરવાના એવા 261 બાળકો, ત્રી, પુરુષ, આબાલ-વૃદ્ધોએ આ ઉગ્ર તપની આરાધના કરી હતી, જેમાં જૈન સોશિયલ ગ્રુપ અંજારનાં 180 સભ્યોમાંથી 60 જણએ આ ઉગ્ર તપની આરાધના કરી હતી. 15 સભ્યોએ વર્ધમાન તપની  આયંબિલની ઓળીનો પાયો નાખ્યો હતો. જૈન સોશિયલ ગ્રુપ અંજારના કારોબારી સભ્યો તરફથી ઉગ્ર અને ભવ્ય તપસ્યા કરનાર 60 સભ્યનું સન્માન કરાયું હતું. કાર્યક્રમના પ્રારંભમાં નાનાં  બાળકોએ સ્વાગત ગીત પ્રસ્તુત કર્યાં હતાં. જૈન સોશિયલ ગ્રુપ અંજારના પ્રમુખ મીનાબેન ભણશાલીએ સ્વાગત ઉદ્બોધન આપ્યું હતું. સંચાલન  પરેશભાઈ ભણશાલીએ કર્યું હતું.