સ્વચ્છ ગાંધીધામ માટે કચરાપેટી વિતરણ શરૂ

ગાંધીધામ, તા. 28 :  શહેરની પાયાની સંસ્થા સિન્ધુ રિસેટલમેન્ટ કોર્પેરેશન દ્વારા ગાંધીધામને સ્વચ્છ બનાવવા માટેના પ્રકલ્પ અંતર્ગત મહાનગરપાલિકા સાથે મળીને વિવિધ સ્થળે કચરાપેટીનું વિતરણ કરવાનો આજથી આરંભ કરવામાં આવ્યો છે. એસ.આર.સી.ના ચેરમેન સેવક લખવાણીના જણાવ્યા પ્રમાણે ગાંધીધામ આદિપુરના વિકાસ માટે ટીમ દ્વારા હાથ  ધરાયેલા વિવિધ પ્રકલ્પ અંતર્ગત ગાંધીધામને સ્વચ્છ બનાવવા માટે વિવિધ સ્થળે કચરાપેટી આપવાનું પણ આયોજન હતું. મહાનગરપાલિકાની સાથે કુલ બે હજાર કચરાપેટીનું વિતરણ એસ.આર.સી. દ્વારા આપવામાં આવશે. જેનો આજથી આરંભ કરવામાં આવ્યો હતો. આ પ્રકલ્પ અંતર્ગત પાતળિયા હનુમાન મંદિર અંતરજાળ, આદિપુર પોલીસ સ્ટેશન, માતા લક્ષ્મી રોટરી સ્કૂલ આદિપુર, આદિપુર ટ્રાફિક પોલીસ ચોકી, મહાદેવ મંદિર અંતરજાળ, આદિપુર એસઓજી કચેરી, આદિપુર 6-બી ચિલ્ડ્રન પાર્ક, આદિપુર એમ.એમ. હોસ્પિટલ, તોલાણી પોલીટેકનિક કોલેજ, તોલાણી કોમર્સ કોલેજ, આદિપુર સરકારી સ્કૂલ, આદિપુર મસ્જિદ, ગાંધીધામ મહાનગરપાલિકા, આદિપુર મૈત્રી સ્કૂલ કેમ્પ્સ અને આદિસર તળાવ ખાતે આજે કચરાપેટીઓનું વિતરણ કરાયું હતું. આગામી સમયમાં  ગાંધીધામના લારી-ગલ્લાધારકોને કચરાપેટી આપવામાં આવશે જેથી નાસ્તાનાં વેચાણનાં સ્થળે સ્વચ્છતા જળવાઈ રહે. નગરપાલિકાની ડોર ટુ ડોર કચરાની ગાડી દ્વારા તમામ લારીધારકો પાસેથી કચરો એકત્ર કરવામાં આવશે. એસ. આર. સીમા નવા બોર્ડની રચના કરાયા બાદ પ્રથમ બોર્ડ બેઠકમાં જ આદિપુરમાં સિટી બસ માટે છ એકર જમીનની ફાળવણી કરવામાં આવી હતી. અને આધુનિક હોસ્પિટલનાં નિર્માણ માટે ગ્લોબલ ટેન્ડરિંગ માટેની કામગીરી પણ હાથ કરવામાં આવી હતી. શહેરના વિકાસ માટે મહાનગરપાલિકાને એસ.આર.સી. દ્વારા પુરતો સહયોગ આપવામાં આવશે તેવું અધ્યક્ષે જણાવ્યું હતું.