અમદાવાદ, તા. 29 (અમારા પ્રતિનિધિ તરફથી) : સમગ્ર
ગુજરાતમાં મતદાર યાદીની ખાસ સઘન સુધારણા ઝુંબેશ હાથ ધરવામાં આવી છે. આ ઝુંબેશ દરમિયાન
રાજ્યભરમાં 14.16 લાખથી વધુ અવસાન પામેલ મતદારો
મતદાર યાદીમાં સામેલ હતા. જ્યારે 2.88 લાખથી વધુ મતદારો તેમના સરનામે ગેરહાજર જોવા મળ્યા, સાથોસાથ 18 લાખથી વધુ મતદારો કાયમી સ્થળાંતરિત
થઈ ચૂક્યા હોવાનું ધ્યાને આવ્યું છે. તદુપરાંત
2.26 લાખથી વધુ મતદારો રિપીટેડ હોવાનું
ધ્યાનમાં આવ્યું છે. નોંધનીય છે કે, મત ગણતરીનો તબક્કો 4થી ડિસેમ્બર સુધી ચાલવાનો છે. 2025ની મતદાર યાદીમાં નોંધાયેલા
5 કરોડથી વધુ મતદારોને ગણતરી ફોર્મનું વિતરણ
કરી દેવામાં આવ્યું છે. રાજ્યના 33 જિલ્લાઓ પૈકી
મોટાભાગના જિલ્લાઓમાં 100% ફોર્મ વિતરણ
સંપન્ન થયું છે. જ્યારે અમુક જિલ્લાઓમાં 100% વિતરણનું લક્ષ્ય હાંસલ થવામાં છે. આ ફોર્મ પૈકી પરત મળેલા ફોર્મને
ડિજીટાઈઝેશનની કામગીરી પુરજોશમાં ચાલી રહી છે. આ કામગીરીમાં 91.41 % ગણતરી ફોર્મના ડિજીટાઈઝેશન
સાથે ડાંગ જિલ્લો મોખરે છે. જ્યારે અન્ય જિલ્લાઓમાં પણ કામગીરી પ્રગતિમાં છે. જે પૈકી
બનાસકાંઠામાં 86.59 ટકા, સાબરકાંઠામાં 86.25,ગીરસોમનાથમાં 85.82, પંચમહાલમાં 84.31, મહીસાગરમાં 84.21, પાટણમાં 83.73, જૂનાગઢમાં 83.34, છોટા ઉદેપુરમાં 82.88, મોરબીમા 82.77 ટકા ગણતરી ફોર્મના ડિજીટાઈઝેશન
થયા છે.
