પ્રિક્રિપ્શન વિના નહીં મળે કફ સિરપ

નવી દિલ્હી, તા. 29 : મધ્ય પ્રદેશમાં તાજેતરમાં કફ સિરપ પીવાના કારણે બાળકોના મૃત્યુના બનાવો સામે આવ્યા હતા અને તેનાથી મધ્ય પ્રદેશ સહિત દેશભરમાં હડકંપ મચ્યો હતો. હવે આવા બનાવોને ગંભીરતાથી લઈને કેન્દ્ર સરકાર દ્વારા એક મહત્ત્વનો નિર્ણય લેવાયો છે. જેના હેઠળ દેશભરના દવા વિક્રેતા એટલે કે મેડિકલ સ્ટોર્સના સંચાલકો તબીબોના પ્રિક્રિપ્શન વિના કફ સિરપ વેચી શકશે નહીં. સરકારની શીર્ષ નિયમક ઔષધિ પરામર્શ સમિતિએ પોતાની 67મી બેઠકમાં કફ સિરપના અનિયંત્રિત વેચાણ ઉપર રોક મુકાવા આ નિર્ણય લીધો છે. જેનાથી હવે દેશભરમાં કફ સિરપ સરળતાથી ઉપલબ્ધ રહેશે નહીં. સરકારનું લક્ષ્ય છે કે લોકો મેડિકલ સ્ટોર્સમાંથી સીધી ખરીદીને બદલે તબીબની સલાહ ઉપર દવા ખરીદે. અત્યારસુધીમાં મોટા ભાગે કફ સિરપ મેડિકલ સ્ટોર્સના કાઉન્ટર ઉપરથી વેચવામાં આવતા હતા, જો કે  કેન્દ્ર સરકારના નવા નિર્ણય બાદ તેના ઉપર લગામ લાગી શકશે. નિર્ણય હેઠળ કફ સિરપને સીધી મેડિકલ સ્ટોર્સમાંથી વેચાઈ શકે તેવી દવાઓની શ્રેણીમાંથી બહાર કરી દેવામાં આવ્યું છે. આ નિર્ણયના ઘણા ફાયદા પણ છે. જેમાં દવાઓના નશા તરીકે ઉપયોગ ઉપર રોક લાગી  શકશે. આ ઉપરાંત ડોક્ટર્સના પ્રિક્રિપ્શન વિના ઘણી વખત લોકો જરૂરિયાત વિના બેધડક એન્ટીબાયોટિક્સનો ઉપયોગ કરતા હતા. જેના કારણે ધીરે ધીરે એન્ટીબાયોટિક્સ અસર કરી રહી નહોતી અને શરીરમાં સંક્રમણ ફેલાવતા બેક્ટેરિયા એન્ટીબાયોટિક્સ ઉપર પ્રતિક્રિયા આપવાનું બંધ કરી રહ્યા હતા. ઉલ્લેખનીય છે કે દેશ અને દેશની બહાર કફ સિરપ પીવાના કારણે ઘણા બાળકોના મૃત્યુના બનાવો સામે આવ્યા હતા. બાળકોના મૃત્યુની સાથે આંતરરાષ્ટ્રીય સ્તરે પણ ભારતની છબી ખરડાઈ રહી હતી. આ તમામ પરિસ્થિતિને ધ્યાને રાખીને હવે કેન્દ્ર સરકારે નિર્ણય લીધો છે કે ડોક્ટર્સના પ્રિક્રિપ્શન વિના કફ સિરપ વેચવામાં ન આવે.