નવી દિલ્હી, તા. 29 : લાંબા સમયથી
ચાલી રહેલા ભાડુઆત અને મકાન માલિક વચ્ચેના વિવાદને ખતમ કરવા માટે ભાડાના કોન્ટ્રાક્ટ
નિયમોને સરળ બનાવવા નવા રેન્ટ એગ્રીમેન્ટ કાયદાને લાગુ કરી દેવામાં આવ્યો છે. કેન્દ્ર
સરકારનો નવો રેન્ટ એગ્રીમેન્ટ નિયમ, 2025 મનમાની રીતે ભાડામાં વધારો, વધારે સિક્યોરિટીની રકમ અને કમજોર દસ્તાવેજો
જેવી બાબતોને રોકશે અને ભાડુઆતોને રાહત આપશે. નવા નિયમો હેઠળ તમામ ભાડાની સમજૂતીને
બે મહિનાની અંદર રજીસ્ટર કરાવવી જરૂરી રહેશે. રજીસ્ટ્રેશન ન કરાવવા ઉપર 5000 રૂપિયાનો દંડ થશે. સૌથી મહત્વપૂર્ણ
સુધારામાંથી એક જમા રકમની મહત્તમ મર્યાદા નક્કી થઈ છે. જે મોટા શહેરોમાં ભાડુઆતો માટે
મોટી રાહત સમાન બની શકશે. નવા નિયમો બેંગલોર, મુંબઈ, હૈદરાબાદ, પુણે અને અન્ય
શહેરોમાં ભાડે રહેતા લોકોને મોટી રાહત આપશે. સાથે જ મકાન માલિકોને પણ એક સ્પષ્ટ માર્ગ
અને વિવાદ સમાધાન માટે પ્લેટફોર્મ પ્રદાન કરશે. ભારતમાં શહેરો તરફ વધતા ભાડુઆત અને
મકાન માલિકોના ઝઘડાને ખતમ કરવાની સાથે જ નવા નિયમ વધારે ભરોસાપાત્ર, સાફ અને કાનૂની રીતે મજબૂત માળખું રજૂ કરશે.નવા કાયદા હેઠળ લિમિટેડ ડિપોઝીટના
કારણે ભાડુઆતોએ ઓછી એડવાન્સ રકમ આપવી પડશે તેમજ મકાન માલિક મનમાની રીતે ભાડુ વસૂલી
શકશે નહી. ભાડુઆતો પાસે એક ડોક્યુમેન્ટ રહેશે અને ડિજીટલ રેકોર્ડ રહેશે. વિવાદનું પણ
તાકીદે સમાધાન કરાવી શકાશે. બીજી તરફ મકાન માલિકો પાસે અનુસરણ કરવા એક જ યોગ્ય નિયમ
રહેશે. જેના કારણે કોર્ટના વિવાદ ઘટશે અને ભાડાની ચુકવણી અને અન્ય કાગળો બાબતે પારદર્શકતા
વધશે. કેન્દ્ર સરકારનો દાવો છે કે રેન્ટ એગ્રીમેન્ટ નિયમ, 2025 સાથે ભાડાની બજારમાં તેજી આવશે.
ખાલી પડેલા આવાસોને મુક્ત કરાશે અને એક સ્વસ્થ્ય,
વિશ્વાસ આધારીત ભાડાની સિસ્ટમનું નિર્માણ થઈ શકશે. ખાસ કરીને ભારતના
મોટા શહેરોમાં ભાડુઆતોને લાંબા સમયથી અસ્પષ્ટ શરતોનો સામનો કરવો પડતો હોવાથી,
સ્થિતિમાં સુધારો આવવાની સંભાવના છે. - દરેક ભાડુઆત પાસે સાઈન કરવાના 60 દિવસની અંદર ડિજીટલ સ્ટેમ્પ
કરેલું અને ઓનલાઈન રજીસ્ટર્ડ રેંટ એગ્રીમેન્ટ હોવું જોઈએ. - જો કોઈ મકાન ભાડે રાખે તો તેના 2 મહિનાથી વધારેની સિક્યોરિટી ડિપોઝીટ લઈ
શકાશે નહી, કોમર્શિયલ ભાડુ છ મહિનાથી
વધુનું નહી હોય. - રજીસ્ટ્રેશન ન કરવા ઉપર રાજ્યોના આધારે 5000 રૂપિયાથી શરૂ થતો દંડ થશે.
- ભાડું માત્ર 12 મહિના પુરા થયા બાદ અને મકાન માલિક દ્વારા 90 દિવસની લેખિત નોટિસ અપાયા બાદ
જ બદલી શકાશે. - જો જરૂરી સમારકામ રિપોર્ટ કરવામાં આવે તો
મકાન માલિકે કાનૂની રીતે 30 દિવસની અંદર
કામ કરવું પડશે, બાકી ભાડુઆત ભાડાની રકમમાંથી
ખર્ચનો વહીવટ કરી શકશે. - ભાડાના રૂમ
કે ઘરમાં તપાસ માટે આવતા પહેલા મકાન માલિકે ઓછામાં ઓછા 24 કલાક પહેલા લેખિત નોટિસ આપવી
પડશે. - ભાડામાંથી નિકળવાની મંજૂરી માત્ર રેન્ટ ટ્રિબ્યુનલના આદેશ અથવા
માત્ર કાનૂની રીતે બતાવવાનાં આધારે જ થશે. મકાન માલિક પોતાની મરજીથી આ કામ કરી શકશે
નહી. - રેન્ટ ટ્રિબ્યુનલને ફાઈનલ કરવાની તારીખથી 60 દિવસની અંદર ભાડાના ઝઘડા ઉપર
નિર્ણય જરૂરી રહેશે. જેમાં ભાડુઆતને હટાવવા જેવો વિવાદ પણ સામેલ છે. - ભાડુઆતોએ ભાડાની પ્રોપર્ટીમાં રહેવાથી પહેલા પોલીસ વેરિફિકેશન
કરાવવું પડશે. - કોઈપણ રીતે બળજબરી બહાર કરવા,
ડરાવવા-ધમકાવવા અથવા વીજળી અથવા પાણીનું કનેક્શન કાપવા ઉપર કાયદાકીય
રીતે સજાની જોગવાઈ છે.
