નવી દિલ્હી, તા.29 : સૉફ્ટવેર
અપડેટને કારણે વિશ્વભરમાં હવાઈ મુસાફરી પ્રભાવિત થઈ છે. આશરે 6000 જેટલા વિમાનોને ગ્રાઉન્ડેડ
કરી દેવા પડયા હતા. સોફટવેર અપડેટ કરવાની આ પ્રક્રિયા બે-ત્રણ દિવસ ચાલી શકે છે. એરબસ
દ્વારા જારી તાત્કાલિક સોફ્ટવેર અપડેટે વિશ્વભરમાં ઉપયોગમાં લેવાતા એ320 એરક્રાફ્ટને અસર કરી હતી. કંપનીએ
વિનંતી કરી છે કે આ સોફટવેરને વિમાનોમાં શક્ય તેટલી વહેલી તકે ઇન્સ્ટોલ કરવામાં આવે.
એરબસના જણાવ્યા મુજબ વિશ્વભરમાં આશરે 6000 જેટ્સને તેમના સોફ્ટવેર અપડેટ કરવાની જરૂર પડશે. નિયમિત સેવા
ફરી શરૂ કરતા પહેલા આ ફ્લાઇટ્સે આ સોફ્ટવેર અપડેટ ઇન્સ્ટોલ કરવું આવશ્યક છે. એરબસે
તાજેતરની ઘટના બાદ આ અપડેટ બહાર પાડયું છે. સૌર કિરણોત્સર્ગે એ320 એરક્રાફ્ટ પર કેટલાક મહત્ત્વપૂર્ણ
ડેટાને અસરગ્રસ્ત કર્યાની સંભાવના છે. આ ડેટા ફ્લાઇટ નિયંત્રણ સાથે સંબંધિત છે. એરબસે
સ્વીકાર્યું છે કે આ સોફ્ટવેર અપડેટ વિશ્વભરમાં ફ્લાઇટ સેવાઓને અસર કરશે. કંપની એ દાવો
કર્યો છે કે આ અપડેટ સલામતીના કારણોસર જરૂરી છે. આ ઘટના 30 ઓક્ટોબરના રોજ કેનકનથી નેવાર્ક
જતી જેટબ્લુ ફ્લાઇટમાં બની હતી. અચાનક ઊંચાઈ ઘટી જવાથી ઘણા મુસાફરો ઘાયલ થયા હતા જેના
કારણે ફ્લાઇટને ઇમરજન્સી લેન્ડિંગ કરવાની ફરજ પડી હતી. બનાવને પગલે યુએસ ફેડરલ એવિએશન
એડમિનિસ્ટ્રેશને તપાસ શરૂ કરી હતી. ત્યારથી વિશ્વભરની એરલાઇન્સે જરૂરી અપડેટ્સ માટે
તૈયારી શરૂ કરી છે. ભારતમાં એ320 એરક્રાફ્ટનો
વધુ ઉપયોગ થાય છે. સોફ્ટવેર અપડેટથી આશરે 400 વિમાનોને અસર થઈ છે જેનો ઉપયોગ ઇન્ડિગો અને એર ઇન્ડિયા દ્વારા
કરવામાં આવે છે. વિશ્વભરમાં 11300થી વધુ એરબસ
એ320 વિમાનો ઉપયોગમાં છે. અહેવાલો
સૂચવે છે કે 6000 વિમાનોને તાત્કાલિક સોફ્ટવેર
અપડેટની જરૂર છે. - રેલવે સાઈટ ઠપ, યાત્રીઓ પરેશાન : નવી દિલ્હી, તા. 29 : આઈઆરસીટીસીની વેબસાઈટ તેમજ એપ `રેલ કનેક્ટ' છેલ્લા 96 કલાકથી એટલે કે, લગભગ ચાર દિવસથી બંધ પડયાં છે. સવારથી સાંજ
સુધી સતત થતા પ્રયાસો નાકામ થઈ રહ્યા છે. સર્વર જવાબ જ નહીં આપતું હોવાથી સર્જાયેલી
અગવડનાં કારણે દેશભરમાં લાખો રેલવે યાત્રી પરેશાન થઈ ગયા હતા. આજે શનિવારની બપોરે બે
વાગ્યાથી શરૂ થયેલાં તત્કાલ બુકિંગનો સમય પણ વીતી ગયો હતો, પરંતુ
કોઈ ટિકિટ વેચાઈ નહોતી. આ સમસ્યા 26 નવેમ્બરથી જારી છે. નાતાલ અને
નવાં વર્ષની રજાઓ માટે અચાનક યાત્રીઓનો ટિકિટ બુકિંગ કરાવવા ધસારો વધી ગયો છે, ત્યારે જ આ સમસ્યા સર્જાતાં લાખો યાત્રી હાલાકીમાં
મૂકાયા છે. તહેવારી દિવસોમાં પોતાનાં ઘરની વાટ પકડવા માટે ટ્રેન ટિકિટ મેળવવાની મથામણમાં
પડેલા યાત્રીઓ મુશ્કેલીમાં મૂકાયા છે. સર્વર ડાઉન થવાથી તત્કાલ ટિકિટ નથી મળતી અને
સામાન્ય બુકિંગ પણ નથી થઈ રહ્યંy. રોજના પાંચથી છ લાખ યાત્રી પરેશાન થઈ રહ્યા છે. રજાઓની મોસમમાં
એક સાથે લાખો યાત્રી લોગઈન કરી રહ્યા હોવાથી સર્વર પર ભારણ વધતાં સમસ્યા સર્જાઈ છે.
