આનંદ કે. વ્યાસ તરફથી : નવી દિલ્હી, તા. 28 : વડાપ્રધાન નરેન્દ્ર મોદીના નિમંત્રણને સ્વીકારીને રશિયાના પ્રમુખ વ્લાદિમીર પુતિન ચાર અને પાંચ ડિસેમ્બરે ભારતના પ્રવાસે આવી રહ્યા છે. પુતિન 23મા ભારત-રશિયા વાર્ષિક સંમેલનમાં સામેલ થશે અને મોદી સાથે શિખર મંત્રણા પણ કરશે. ભારત અને રશિયા વચ્ચે દર વર્ષે સંમેલન યોજાય છે જેમાં પુતિન છેલ્લે 2021માં ભારત આવ્યા હતા. આમ ચાર વર્ષે રશિયાના પ્રમુખ ભારતની યાત્રાએ આવી રહ્યા છે. આ વર્ષે ભારત-રશિયા સંમેલનમાં બંને દેશ વચ્ચે સૈન્ય અને ટેક્નોલોજી ક્ષેત્રે સહયોગ ઉપર વિશેષ ચર્ચા થશે અને સંરક્ષણ સોદાઓની ધારણા છે. વિદેશ મંત્રાલયનાં નિવેદનમાં જણાવાયું હતું કે, વડાપ્રધાન મોદીનાં આમંત્રણને પગલે રશિયાના પ્રમુખ ચાર અને પાંચ ડિસેમ્બરે ભારતની મુલાકાતે આવી રહ્યા છે. મોદી અને પુતિન વચ્ચે શિખર મંત્રણા થશે જેમાં બંને નેતાઓ દ્વિપક્ષીય સંબંધોને વધુ મજબૂત કરવાની ચર્ચા કરશે. રાષ્ટ્રપતિ દ્રૌપદી મુર્મુ પણ પુતિનનું સ્વાગત કરશે અને રાષ્ટ્રપતિ ભવનમાં પુતિનનાં સન્માનમાં ભોજન સમારંભ પણ આયોજિત કરાયો છે. વિદેશ મંત્રાલયના નિવેદન પ્રમાણે પુતિનની આ મુલાકાત બંને દેશોના દાયકાઓ જૂના અને મજબૂત મૈત્રીપૂર્ણ સંબંધોને વધુ ઊંચાઇએ લઇ જવા માટે મહત્ત્વની છે. પુતિનની આ ભારતયાત્રા રશિયા અને ભારત વચ્ચેના રાજદ્વારી અને વ્યૂહાત્મક સંબંધોની દ્રષ્ટિએ ખૂબ જ મહત્ત્વની છે જેના ઉપર સમગ્ર વિશ્વની નજર રહેશે. બંને નેતાઓ વચ્ચેની બેઠકમાં સ્થાનિક અને વૈશ્વિક મુદ્દાઓની ચર્ચા પણ થશે. ભારત અને રશિયા વચ્ચે દર વર્ષે સંમેલન થાય છે, ગયા વર્ષે જુલાઇમાં બાવીસમાં સંમેલનમાં ભાગ લેવા મોદી મોસ્કોની મુલાકાતે ગયા હતા અને આ વર્ષે 23મા સંમેલનમાં પુતિન હાજર રહેશે. આ વર્ષે બંને દેશો વચ્ચે સૈન્ય અને ટેકનોલોજી ક્ષેત્રમાં સહયોગ ઉપર વિશેષ ધ્યાન અપાશે એવું રાજકીય વિશ્લેષકોનું માનવું છે. ટોચના સૂત્રોમાંથી મળતી માહિતી પ્રમાણે પાકિસ્તાનમાં ધમધમતા આતંકવાદને કમરતોડ ફટકો મારનારા ભારતીય સેનાના ઓપરેશન સિંદૂર દરમિયાન પાકિસ્તાનના હવાઇ આક્રમણને ધૂળ ચાટતું કરી દેનારી રશિયાન હવાઇ સુરક્ષા પ્રણાલી એસ-400ની દુનિયાભરમાં પ્રશંસા થઇ રહી છે. તેથી ભારત રશિયા પાસેથી વધુ એસ-400 પ્રણાલી ખરીદવા ઇચ્છુક છે. ભારતે 2028માં આવા પાંચ યુનિટ ખરીદવા પાંચ અબજ ડોલરનો સોદો કરેલો, જેમાંથી ત્રણ રેજિમેન્ટ મળી ચૂકી છે. બાકીની બે રેજિમેન્ટ આવતા વર્ષે મળવાની છે. રશિયાના પ્રમુખ પુતિનની ભારતયાત્રા એવા સમયે થઇ રહી છે જ્યારે અમેરિકા રશિયા પાસેથી ઓઇલ ન ખરીદવા ભારત ઉપર દબાણ કરી રહ્યું છે. જો કે, ભારત અને રશિયાના મજબૂત સંબંધો ઉપર અમેરિકાના દબાણ અને ઓઇલની આયાત પર કોઇ અસર જણાતી નથી. હાલમાં ચીનમાં યોજાયેલી શાંઘાઇ સહયોગ સંગઠન સંમેલનમાં વડાપ્રધાન મોદી અને પ્રમુખ પુતિન વચ્ચે શિખર મંત્રણા થઇ હતી, જેમાં મોદીએ પુતિનને નિમંત્રણ આપતાં કહ્યું હતું કે, 140 કરોડ ભારતવાસીઓ ડિસેમ્બરમાં આપનું સ્વાગત કરવા ઉત્સુક છે. ભારત-રશિયા વચ્ચેની શિખર મંત્રણામાં રશિયા-યુક્રેન વચ્ચે ચાલી રહેલા સૈન્ય સંઘર્ષ સંબંધે પણ ચર્ચા થવાની શક્યતા છે.
