નવી દિલ્હી,
તા. 28 : મોંઘવારી, બેરોજગારીની બૂમરાણ વચ્ચે અમેરિકી
ટેરિફના દબાણનેય મચક નહીં આપતાં ભારત દેશની અર્થવ્યવસ્થા જેટ ગતિ સાથે આગળ વધી રહી
છે. અનુમાનોને આંબી જતા આંકડાઓ પણ નજર કરીએ તો નાણાકીય વર્ષ 2025-26ના બીજા ત્રિમાસિક ગાળામાં ભારતનો સમગ્ર ઘરેલુ ઉત્પાદન
(જીડીપી.) દર 8.2 ટકા રહ્યો
હતો. આ જીડીપી દર છ ત્રિમાસિક ગાળા એટલે કે, 18 મહિનામાં
સૌથી ઊંચો છે. આ આંકડો વિતેલાં વર્ષના સમાન સમયગાળાની તુલનાએ 5.6 ટકા કરતાં વધારે છે. ઉત્પાદનની સાથે માળખાંકીય સુવિધાઓ, ગ્રામીણ માંગમાં વધારો અને મજબૂત સેવા ક્ષેત્રએ આ તેજીનું નેતૃત્વ કર્યું છે.
જુલાઈથી સપ્ટેમ્બરના ત્રિમાસિક ગાળા દરમ્યાન સ્થિર મૂલ્યો પર જીડીપીનું કદ 48.63 લાખ કરોડ રૂપિયા રહ્યું હતું. આ કદ એક વરસ પહેલાં 44.94 લાખ કરોડ રૂપિયા હતું. નોમિનલ જીડીપી દર 8.7 ટકા વધીને 85.25 લાખ
કરોડ થઈ ગયો છે. ઉત્પાદન ક્ષેત્રમાં 9.1 ટકા, બાંધકામ ક્ષેત્રમાં 7.2 ટકા
અને વ્યાપક સેકંડરી ક્ષેત્રોમાં 8.12 ટકા
જેટલો વિકાસદર નોંધાયો છે. ભારતીય અર્થવ્યવસ્થામાં સેવા ક્ષેત્ર સૌથી શ્રેષ્ઠ પ્રદર્શન કરનારું ક્ષેત્ર
બની રહ્યું, જ્યારે ત્રીજી હરોળનાં ક્ષેત્રમાં 9.2 ટકાની વૃદ્ધિ નોંધાઈ. આ 9.2 ટકાની વૃદ્ધિ ખાસ કરીને ફાઈનાન્સ (નાણાં), રિયલ એસ્ટેટ અને અન્ય કારોબારી સેવાઓનાં ક્ષેત્રમાં 10.2 ટકાની મજબુત વૃદ્ધિથી પ્રેરિત રહી છે. તાજા આંકડા વિતેલા
એપ્રિલથી જૂનના ત્રિમાસિક ગાળાના 7.8 ટકાથી
વધારે છે. આ વખતના આંકડા બતાવે છે કે, ઉપભોકતા ખર્ચમાં શાનદાર તેજી અને મેન્યુફેકચરિંગ
(ઉત્પાદન) ક્ષેત્રનાં જોરદાર પ્રદર્શનનાં પગલે જીડીપી આઠ ટકાનો આંકડો આંબી ગયો છે.
સરકારે જારી કરેલા આંકડા અનુસાર આ વખતે અંગત ઉપભોગ (વપરાશ)માં વધારો જોવા મળ્યો હતો.
જો કે, કૃષિ ક્ષેત્ર થોડું પાછળ રહ્યું. આ ક્ષેત્રમાં માત્ર 3.5 ટકાનો વધારો જોવા મળ્યો હતો. બીજી તરફ વીજળી, ગેસ, પાણી પુરવઠા જેવાં ક્ષેત્રોમાં 4.4 ટકાનો વધારો નોંધાયો, જે આ ક્ષેત્રો માટે કમજોર સ્થિતિ બતાવે છે.
