ભુજ/ગાંધીધામ,
તા. 28 : ગઢશીશા
પંથકના નખત્રાણા તાલુકાના મંગવાણા-વડવાકાંયા વચ્ચેના માર્ગે આજે સવારે બાઈક અને બોલેરો
વચ્ચે અકસ્માત સર્જાતા બાઈકચાલક વડવાકાંયાના 59 વર્ષીય
વૃદ્ધ ભાવસંગજી અજુભા જાડેજાને ગંભીર ઈજા પહોંચતા તેમનું કરુણ મૃત્યુ થયું હતું. બીજીતરફ
ગત તા. 24-11ના સવારે રાધનપુર-સામખિયાળી
ધોરીમાર્ગ ઉપર અજાણ્યા વાહનની હડફેટે ચડેલા મોટરસાઈકલ ચાલક રાજુભાઈ ભાણાભાઈ કોળીનું
મોત થયું હતું. મંગવાણા વડવાકાંયા વચ્ચે આજે સવારે સર્જાયેલા અકસ્માત અંગે સંબંધિત
સૂત્રો પાસેથી મળેલી વિગતો મુજબ ખેતી અને બસ ડ્રાઈવરના વ્યવસાય સાથે સંકળાયેલા વડવાકાંયાના
ભાવસંગજી જાડેજા સવારે મંગવાણાથી સ્કૂલ બસ ઉપાડી બાળકો લઈ સ્કૂલે પહોંચાડી પરત લાવી
સ્કૂલ બસ મંગવાણામાં રાખતા હતા. ભાવસંગજી તેમના નિયતક્રમ મુજબ સવારે પોતાના ઘરે વડવાકાંયાથી
મંગવાણા પોતાના કબજાની બાઈકથી આવી રહ્યા હતા. ત્યારે બોલેરો નં. જીજે 10 ટીવી 6546 સાથે
અકસ્માત સર્જાતા ગંભીર રીતે ઘાયલ થયા હતા. તેમને સારવાર અર્થે મંગવાણાની સરકારી હોસ્પિટલ
ખસેડાયા હતા. પરંતુ સારવાર નસીબ થાય તે પૂર્વે જ તેમણે દમ તોડી દીધો હતો. અકસ્માતના
બનાવના સમાચાર વહેતા થતા ભાવસંગજીના પરિજનો તથા સમાજના અગ્રણીઓ હોસ્પિટલ દોડી આવ્યા
હતા. બીજીતરફ રાધનપુર થી સામખિયાળી તરફ આવતા પુલીયા ચડતા પહેલા ગત તા.24/11 ના સવારે 7.45 વાગ્યાના
અરસામાં અકસ્માત થયો હતો. અજાણ્યા વાહન ચાલકે બેદરકારીપૂર્વક પોતાનુ વાહન ચલાવીને મોટર
સાઈકલ જીજે.12.બી.એસ.6423ને ટકકર મારી હતી. જેમાં રાજુભાઈને ગંભીર પ્રકારની
ઈજા પહોંચી હતી.તેમને સારવાર કારગત નીવડે તે પહેલા તેમણે આંખો મીંચી લીધી હતી. આ અંગે
ભાણાભાઈ ઉર્ફે ભાણજીભાઈ સાદુરભાઈઈ કોળીની ફરીયાદના આધારે પોલીસે વધુ તપાસ આરંભી છે.
