ગાંધીધામ, તા. 6 : ભચાઉ તાલુકાના જૂના કટારિયા ગામે ઘરની સામે
પાર્ક કરાયેલ રૂા. 1,40,000ની બોલેરોની નિશાચરોએ ચોરી કરી હતી. જૂના કટારિયામાં શક્તિનગર
વિસ્તારમાં રહેતા તેજુદાન હિંગોળદાન ગઢવીએ આ બનાવ અંગે પોલીસ મથકે ફરિયાદ નોંધાવી હતી.
આ ફરિયાદી યુવાને વર્ષ 2009ની મોડેલની બોલેરો ગાડી નંબર જી.જે.-01-એચ.એસ.- 9432વાળી
બે વર્ષ પહેલાં ખરીદી હતી. ગત તા. 1-8નાં પોતાના ઘરની સામે સાર્વજનિક પ્લોટમાં આ યુવાને
ગાડી પાર્ક કરી રાત્રે સૂઇ ગયા હતા. બીજા દિવસે સવારે વાહન ગુમ જણાયું હતું. ગાડીની
ચાવી ઘરમાં જ પડી હતી. વાહનના ચીલા પાછળ-પાછળ જતાં આ ગાડી અજંતા બ્રિજ બાજુ ગઇ હોવાનું
બહાર આવ્યું હતું. નિશાચરો રૂા. 1.40 લાખની આ ગાડી ગમે તે રીતે ચાલુ કરી હંકારી ગયા
હતા. પોલીસે બનાવ અંગે ફરિયાદ નોંધી આગળની તપાસ હાથ ધરી છે.
