વાગડને આગળ લઇ જવા જળાશયો જરૂરી

વાગડને આગળ લઇ જવા જળાશયો જરૂરી
સૂર્યશંકર ગોર દ્વારા - રાપર, તા. 24 : નર્મદા મૈયાની કેનાલ કોરી કટ થઇ જતાં વાગડમાં ઠેર ઠેર પાણીનો પોકાર ઊઠી રહ્યો છે. ગાંધીનગર સુધી રજૂઆતો શરૂ થઇ ગઇ છે. એક અંતરિયાળ વિસ્તાર અને એનું પશુધન કાળઝાળ ગરમીમાં પાણી વિના કેવી અવદશા હશે એ કલ્પના જ ધ્રુજાવી મૂકે છે. હાલે વાગડ વિસ્તાર  મોટા ભાગે નર્મદા કેનાલના નીર પર જ આધારીત છે. એ કેનાલના પ્રતાપે ફતેહગઢ, લાકડાવાંઢ અને સુવઇ ડેમ ભરવામાં આવે છે. કલ્પના કરો કે, નર્મદાની નહેર અને પાઇપવાટે 500 કિલોમીટર દૂરથી આવતું પાણી ના હોત તો? વાગડ આજે વેરાન બની ગયું હોત...શાસકનો આપદ ધર્મ છે કે પ્રજા કોઇ વાતે પીડાવી ના જોઇએ, પરંતુ છેલ્લા કેટલાક સમયથી કેનાલનું પાણી બંધ થતાં પાયમાલી મોઢું ફાડીને ઊભી છે. દેશના વડાપ્રધાને તાજેતરમાં 75 ડેમ બાંધવાની વાત મૂકી. હકીકતે કચ્છમાં એમાંય વાગડમાં એવી કેટલીક કુદરતી સાઇટો છે જ્યાં  વરસાદી પાણીનો  વિપુલ માત્રામાં સંગ્રહ કરવામાં આવે તો વાગડ કાયમી ન્યાલ રહે. એ લાખો લોકો માટે ઉપયોગી બની રહે, તેવી જગ્યાએ આ ડેમ બનવા જોઇએ. જાગૃત નાગરિકો કહે છે કે, પ્રાંથળ માટે પાણીનો પ્રશ્ન એ પ્રાણ પ્રશ્ન છે. મૌવાણાથી ઠેઠ લોદ્રાણી સુધી મોવાણિયો અને નીલવો ડુંગર રણને રોકીને બેઠા છે. એ જગ્યાએ વિશાળ ડેમ બની શકે એમ છે કે, પ્રાંથળ અને વાગડ ન્યાલ થઇ જાય. મિનિ સરદાર સરોવર બની શકે એમ છે. કરોડો લિટર વરસાદનું પાણી રણમાં ઠલવાય છે. એટલી બધી વિશાળ સાઇટ છે કે, જો તેનો ઉત્તમ રીતે સર્વે કરી પાણીની બુંદ-બુંદ બચાવાય  તો એ બચેલું પાણી અનેક જિંદગીઓને અચૂક બચાવે એમ છે. બાલાસરથી નીલવા ડુંગરની ધારે ધારે જંગલ સફારી ઊભી કરવામાં આવે તો બાલાસરથી નીલાગર અને બેલા વરુડી માતા મંદિર ત્યાંથી વ્રજવાણી અને ત્યાંથી બાલાસર એ મુજબ પ્રવાસીઓ માટે અતિ આકર્ષણનું કેન્દ્ર બને હજારો લોકોને રોજી મળે એવો નજારો અહીં છે. આ વિસ્તારના શિક્ષિત યુવાન સહદેવસિંહ હનુભા વાઘેલા કહે છે કે, ઘડુલી સાંતલપુર રોડ અહીંથી જ પસાર થાય છે. જો જળસંચયનું વિશાળ કામ હાથ ધરાય તો  નીલવા ડુંગરની તળેટીનો ડેમ રાપર નગરની પણ તરસ છીપાવી શકે એવું લિફ્ટથી પાણી પહોંચી શકે એટલી વિશાળ જલરાશીની અહીં સંભાવના છે. ખડીર પંથકમાં પણ વરસાદનું એક પણ ટીપું રણમાં ન જાય એવું આયોજન થાય તો ખડીર પણ ન્યાલ થાય. અહીં પણ એવી કુદરતી સાઇટો ઉપલબ્ધ છે. ઉપરાંત બાદરગઢ પાસેની ટેકરીઓનું પાણી પણ યોગ્ય રીતે સંગ્રહ થાય અને અડુંવા ડુંગરમાંથી હાલે જે જલરાશી આવે છે તે સુવઇ ડેમમાં જાય છે, તેમજ બાદરગઢના ડુંગરોનું પાણી હાલે નીલપર ડેમમાં  જાય છે. આ ડેમ મોટો બને તો  આ પંથકનું બહુ જ મોટું કામ થાય. અમૃત જેવું વરસાદી પાણી જ્યારે સાંચવી નથી શકતાં એના લીધે ઉનાળામાં પાણીના પોકાર ચારેબાજુ ઊઠે છે. સૌ વાગડવાસી પક્ષાપક્ષીથી પર રહી પાણીની કાયમી સળગતી સમસ્યા ઉકેલવા આગળ આવે તો આઝાદીનું અમૃત પર્વ ઊજવ્યું સાર્થક થાય. એવું અભ્યાસુઓનું કહેવું છે અને તેઓ છેલ્લે સગર્વ એક વાત ઉમેરે છે કે, વાગડના ખેડૂત પોતાના તળાવોમાં વરસાદી પાણી સંગ્રહી ખેતી કરે છે અને પરસેવો પાડે છે. પૂર્વ ધારાસભ્યએ પોતાની ગ્રાન્ટ આવા તળાવોનાં નિર્માણાર્થે વાપરીને  લોકોને આવા તળાવોનું મહત્ત્વ પણ સુપેરે સમજાવ્યું છે, ત્યારે હવે વાગડને આગળ રાખવું હશે તો દૂરંદેશીભર્યા મોટા નિર્ણયો લેવા પડશે અને સરકારમાંથી પાસ પણ કરાવવા પડશે. 

Crime

© 2022 Saurashtra Trust

Developed & Maintain by Webpioneer