ગુજરાત વિધાનસભાની ચૂંટણી વહેલી યોજાવાના સંકેતો...

હૃષીકેશ વ્યાસ દ્વારા - અમદાવાદ, તા. 24 : ગુજરાત વિધાનસભાની મુદ્દત આગામી ડિસેમ્બર-2022માં પૂરી થાય છે, આમ રાજ્ય વિધાનસભાની ચૂંટણી પણ સ્વાભાવિક રીતે આ સમયગાળા દરમ્યાન જ યોજાય, પરંતુ હાલ રાજ્યમાં ઊભી થયેલી રાજકીય, સામાજિક અને આર્થિક પરિસ્થિતિવશ આ ચૂંટણીઓ દેશમાં એપ્રિલ-મે માસમાં યોજાનારી પાંચ રાજ્યોની ચૂંટણીઓની સાથોસાથ યોજાય તેવી સંભાવના હાલ નકારી શકાતી નથી. સૂત્રોના જણાવ્યા અનુસાર રાજ્ય વિધાનસભાની ચૂંટણીઓ વહેલી યોજવા બાબતે હાલ કોઈ નિર્ણય લેવાયો નથી પણ જો-તોનાં સમીકરણોને આધીન છે એટલે તેમાં સંજોગો મુજબ ફેરફાર પણ આવી શકે છે. જેને લઇને ફેબ્રુઆરીના ત્રીજા સપ્તાહ દરમ્યાન યોજાનારા બજેટ સત્રમાં પણ ગુજરાત સરકાર દ્વારા વર્ષ 2022-23નું સંપૂર્ણ બજેટનું કદ (ડ્રાફટ) તો રજૂ કરાશે પરંતુ સરકાર દ્વારા સંપૂર્ણ બજેટ નહીં પણ સરકારના ચાર માસના વહીવટી ખર્ચને પહોંચી શકાય તે રીતેનું લેખાનુદાન (વોટ-ઓન-એકાઉન્ટ, આંશિક બજેટ) જ પસાર કરાશે.નોંધનીય છે કે, વર્ષ 2021-22માં સરકારે કુલ રૂા. 2.23 લાખ કરોડનું વાર્ષિક બજેટ મંજૂર કરાવ્યું હતું. આ વખતે અંદાજે કુલ રૂા. 2.32 લાખ કરોડની આસપાસના બજેટનું  કદ હશે અને એના 4 માસ માટે અર્થાત આશરે 55,833 કરોડ કે 60,000 કરોડનું લેખાનુદાન મંજૂર કરાય તેવી સંભાવના છે. આમ વિધાનસભાની વહેલી ચૂંટણીઓ તથા સંપૂર્ણ બજેટને બદલે વોટઓન એકાઉન્ટ જેવા મહત્ત્વના નિર્ણયો 10થી 12મી જાન્યુઆરી - 2022માં યોજાનારી વાયબ્રન્ટ ગુજરાત સમિટની સફળતા બાદ જ લેવાશે. મહત્ત્વનું છે કે, ગત 17 સપ્ટેમ્બરના રૂપાણી સરકારને બદલીને ભૂપેન્દ્ર પટેલ જેવા નવા અને સીધા-સરળ ધારાસભ્યના નેતૃત્વમાં આખેઆખી નવી સરકારના હાથમાં સત્તાના સૂત્રો સોંપી દેવાયા હતા. હવે આ સરકારને ડિસેમ્બર-2022 સુધી એટલે કે વિધાનસભાની ચૂંટણી નિયત સમયે જ યોજાય તો સત્તાધારી-ભાજપને ધાર્યા મુજબનો લાભ ઓછો થવાની શક્યતા અંકાઈ રહી છે. જેના મુખ્ય કારણોમાં કોરોનાની બીજી લહેર દરમ્યાન સરકારની ધોવાયેલી શાખ, કોરોનાના નિયંત્રણોને કારણે અર્થતંત્રને પડેલો આર્થિક ફટકો, રાજ્ય સરકારની પોતાના વેરાની અને ભારત સરકાર પાસેથી લેવા પાત્ર હિસ્સામાં થયેલો ધરખમ ઘટાડો, સરકારના ચાલુ બજેટમાંથી મોટા-મોટા વિભાગના બેજટની રકમનો કોરોનાના દર્દીઓની સરકારી-ખાનગી હોસ્પિટલોમાં થયેલો ધરખમ ખર્ચ, વિનામૂલ્યે કરાયેલા વેક્સિનેશનમાં થયેલો મોટો ખર્ચ, ચોમાસામાં વધુ વરસાદ છતાં ડેમોમાં ભરાયેલાં ઓછાં પાણીથી ઉનાળામાં ઊભી થનારી સિંચાઈ માટે પાણીની સંભવિત તંગી, નવનિયુક્ત સરકારનો લોકોમાં કેટલા અંશે સ્વીકાર થાય છે તે, ભાજપની આંતરિક ખેંચતાણની સ્થિતિ અને સામે પક્ષે કોંગ્રેસ સહિતના અન્ય રાજકીય પક્ષોની નિક્રિયતા સહિતના અનેક એવાં કારણો છે જે વહેલી ચૂંટણી યોજવાની દિશામાં સરકાર આગળ વધે તેવા સંકેત આપી રહ્યાં છે. 10મીથી 12મી જાન્યુઆરી, 2022માં વડાપ્રધાન નરેન્દ્ર મોદીના હસ્તે હંમેશની જેમ વાયબ્રન્ટ ગુજરાત ગ્લોબલ સમિટનું પણ ઉદ્ઘાટન થવાનું છે અને તેને વૈશ્વિક કક્ષાની સમિટ સાબિત કરીને અર્થાત રાજ્યનું અર્થતંત્ર પુન: ગતિશીલ બને તે રીતે વધુમાં વધુ મૂડીરોકાણ માટેના એમઓયુ (સમજૂતી કરાર) કરાય તે રીતે તમામ પ્રયત્નો કરાઈ રહ્યા છે. જો, સરકારની અપેક્ષા પ્રમાણે સમિટને સફળતા હાંસલ થશે તો ગુજરાત વિધાનસભાની ચૂંટણી સંભવત: એપ્રિલ-મે-2022માં એટલે કે તેના નિયત સમય કરતાં વહેલી યોજાશે. સામાન્ય રીતે ગુજરાત વિધાનસભાનું બજેટ સત્ર દર વર્ષના ફેબ્રુઆરી માસના ત્રીજા સપ્તાહમાં મળતું હોય છે. જે માર્ચના અંત સુધી ચાલતું હોય છે. આ સત્ર દરમ્યાન રાજ્ય સરકાર દ્વારા સરકારનું નવા નાણાકીય વર્ષનું સંપૂર્ણ બજેટ રજૂ કરાતું હોય છે પરંતુ આ વખતે વિધાનસભાની ચૂંટણી તેના નિયત સમયે ડિસેમ્બર-2022માં યોજાય અને જો વહેલી ચૂંટણીઓ આવે તો એપ્રિલ-મે-2022માં યોજાય તેવી શક્યતાઓને પગલે રાજ્ય સરકાર દ્વારા વિધાનસભાના આ વખતના બજેટ સત્રમાં વર્ષ 2022-23ના નવા વર્ષ માટે સંપૂર્ણ કદનું ડ્રાફ્ટ બજેટ તો રજૂ કરાશે પરંતુ વિધાનસભા પાસેથી માત્ર 4 મહિનાના સરકારના વહીવટી ખર્ચને પહોંચી વળવા જેટલું જ લેખાનુદાન (વચગાળાનું-આંશિક) બજેટ રજૂ કરાશે. - નવા સીમાંકનમાં વિધાનસભાની બેઠક 26 ટકા વધશે : અમદાવાદ/ભુજ, તા. 24 : એક બાજુ વિધાનસભાની ચૂંટણીઓ સમયથી પહેલા યોજાય તેવી આજે અટકળો વહેતી થઈ હતી, ત્યાં બીજીબાજુ ગુજરાતમાં વિધાનસભાની બેઠકોમાં 26 ટકાનો વધારો થશે તેવીય શક્યતા વ્યક્ત થઈ છે. બીજી તરફ સીમાવર્તી કચ્છની વિધાનસભા અને લોકસભાની બેઠકની સંખ્યા વધવાની સંભાવના છે. ધારાસભાની બેથી વધુ બેઠક વધશે. લોકસભા બેઠક પણ બે થઈ શકે એવી સંભાવના જોવાઈ રહી છે. ચૂંટણી પંચના સૂત્રોએ માધ્યમો સમક્ષ કરેલા દાવા મુજબ ગુજરાતમાં નવું સીમાંકન થશે. જો કે, તે 2026 પછી લાગુ થશે. હાલની ચૂંટણીમાં નહીં. લગભગ 52 વર્ષના સમયગાળા બાદ થઈ રહેલા આ સીમાંકનથી નેતાઓની તમામ રાજકીય ગણતરીઓ પલટી જશે. ધારાસભ્યોની હાલની સંખ્યા 182 છે. જે વધીને 230 થઈ જશે. જ્યારે 47 વર્ષ બાદ ગુજરાતના સાંસદની સંખ્યા પણ વર્તમાનમાં 26થી વધીને 44 પર પહોંચી જશે.પંચના સૂત્રોએ વધુમાં દાવો કર્યો કે, નવું સીમાંકન રાજ્યની વસતી અને જ્ઞાતિના આધારે બેઠક વધારાથી આવી શકે છે. જેનો અમલ 2027ની વિધાનસભા અને 2029ની લોકસભા ચૂંટણીમાં થશે.ઉલ્લેખનીય છે કે, ગુજરાતમાં હાલ 2001ની વસ્તી મુજબ 2006નું સીમાંક કરવામાં આવ્યું છે. હાલમાં વિધાનસભામાં 142 સામાન્ય બેઠક છે. જ્યારે બાકીની અનામત છે. 

© 2021 Saurashtra Trust

Developed & Maintain by Webpioneer