Editorial

વિપક્ષી એકતાનો મોરચો માત્ર રેલીઓથી શક્ય નથી

દેશમાં વડાપ્રધાન નરેન્દ્ર મોદીનાં સબળ નેતૃત્વને પડકારવા માટે સતત મથતા વિપક્ષે વધુ એક વખત એકતા ઊભી કરવાની હવા જમાવવાનો પ્રયાસ શરૂ કર્યો છે. લગભગ તમામ વિપક્ષી નેતાઓ જ્યારે મોદીને મહાત કરીને વડાપ્રધાનપદ હાંસલ કરવાનાં સપના જોતા હોય તેવામાં વિપક્ષી એકતાના કોઇપણ પ્રયાસની સફળતા સામે હંમેશાં પ્રશ્નાર્થ જાગતો રહેતો હોય છે. બિહારના મુખ્યમંત્રી નીતીશકુમારે ભાજપ સાથે છેડો ફાડીને લાલુ પ્રસાદ યાદવના રાષ્ટ્રીય જનતા દળની સાથે હાથ મીલાવ્યા છે, ત્યારથી તેમણે વિપક્ષી એકતા માટે પ્રયાસ શરૂ કર્યા છે, પણ અગાઉથી વડાપ્રધાનપદની લાહ્યમાં બેઠેલા બાકીના વિપક્ષી નેતાઓ આ એકતા ઊભી કરી શકશે અને કરી શકશે તો તેને જાળવી શકશે કે કેમ એ સવાલ ઊભો કર્યો છે. આ સંદર્ભમાં તાજેતરમાં હરિયાણામાં ઇન્ડિયન નેશનલ લોકદળ દ્વારા ચૌધરી દેવીલાલની 109મી જયંતી પ્રસંગે યોજાયેલી શક્તિ પ્રદર્શન રેલીમાં નીતીશકુમારે હાજરી આપી હતી. રેલીમાં નીતીશ બિહારના નાયબ મુખ્યમંત્રી અને રાજદના નેતા તેજસ્વી યાદવને સાથે લાવ્યા હતા. આ ઉપરાંત એનસીપીના વડા શરદ યાદવ, શિરોમણી અકાલી દળના નેતા સુખબીર બાદલ, સામ્યવાદી પક્ષના નેતા સીતારામ યેચુરી પણ રેલીમાં હાજર રહ્યા હતા. લોકદળે તેના આ નેતાની જયંતી પ્રસંગે યોજાયેલી રેલીને વિપક્ષી એકતાના મંચ તરીકે પ્રદર્શિત કરવા દસ રાજ્યના 17 નેતાને હાજર રહેવા આમંત્રણ આપ્યું હતું, પણ વાસ્તવમાં માત્ર પાંચ નેતા જ હાજર રહ્યા હતા. આ વાત બતાવે છે કે, વિપક્ષી એકતા માત્ર વાતો પૂરતી મર્યાદિત રહી જાય છે. રેલીમાં જોકે નીતીશકુમારે જાહેર કર્યું કે, ત્રીજો મોરચો રચાશે નહીં. જોકે કોંગ્રેસને સાથે લેવાના પ્રયાસ કરાશે એમ પણ તેમણે કહ્યંy હતું. આવી વાત પહેલી વખત થઇ નથી. અગાઉ પણ વિપક્ષી જોડાણની વાતો થઇ ચૂકી છે. નીતીશકુમારે થોડા સમય અગાઉ તેલંગાણાના મુખ્યમંત્રી કે. ચંદ્રશેખર રાવની સાથે મંચ પરથી સંબોધન કર્યું હતું. પશ્ચિમ બંગાળનાં મુખ્યમંત્રી મમતા બેનરજી પણ બિનભાજપી અને બિનકોંગ્રેસી મોરચો રચવાની વાત કરી ચૂક્યાં છે. અત્યાર સુધી વિપક્ષી એકતાની વાતો રાજકીય નિવેદનબાજીથી વિશેષ ન હોવાની છાપ ઊભી થતી આવી છે. એકતા માટે મથી રહેલા વિરોધપક્ષોમાં આંતરિક મર્યાદાઓ અને નબળાઇઓ પણ ઊડીને આંખે વળગે તેવી છે. કોંગ્રેસ પોતે અસ્તિત્વ માટે મથી રહી છે તો પ્રાદેશિક પક્ષો તેમનાં રાજ્યો સુધી મર્યાદિત બની રહ્યાં છે, તો પંજાબના વિજયથી પોરસાયેલી આમ આદમી પાર્ટી એકલા હાથે મેદાનમાં ઉતરવા થનગની રહી છે. ભાજપ અને મોદીના વિરોધનાં નામે અમુક વિપક્ષી નેતાઓ એક મોરચો ઊભો કરવાની વેતરણમાં છે, પણ તેઓ હજી તેમના નેતા કે એજન્ડા અંગે પણ કોઇ સ્પષ્ટ વ્યૂહ ધરાવતા નથી. નબળી કોંગ્રેસ રાષ્ટ્રીય છબી ધરાવે છે, પણ હાલે તેની ભારત જોડો યાત્રા દરમ્યાન યુપીએમાં વધુ પક્ષ જોડાય તેની કોઇ તસ્દી લેવાતી જણાઇ નથી. ખરેખર તો કોંગ્રેસે આ યાત્રામાં અન્ય વિરોધપક્ષોના નેતાઓને જોડયા હોત તો તેની અસર જરૂર વર્તાત. વિપક્ષના નેતાઓને સમજી લેવાની જરૂરત છે કે, માત્ર નિવેદનો કરીને કે બેઠકો કરીને કે રેલીઓ સંબોધીને એક સંયુક્ત મોરચો રચી શકાય તેમ નથી. આ માટે મોદીના વિરોધ સિવાયની સમાન વિચારધારા ઘડી કાઢવા પર ધ્યાન આપવાની જરૂરત છે.

ખેલાડીઓની ઉપેક્ષા

દેશ એકતરફ લિમ્પિકમાં સુપરપાવર બનવાનું સપનું જોઇ રહ્યો છે, રમતનો માહોલ બની રહ્યો છે, પરંતુ રાષ્ટ્રીય સ્તરે હજુ એવી માનસિકતા નથી કેળવાઇ. પશ્ચિમ ઉત્તર પ્રદેશનાં સહારનપુરથી આવેલા વાયરલ વીડિયોમાં દેખાઈ રહ્યું છે કે, ત્યાં કબડ્ડી ચેમ્પિયનશિપમાં ભાગ લેવા આવેલી કન્યાઓ માટે સ્વિમિંગ પૂલમાં લંચ બનાવવામાં આવ્યું હતું, પછી તેને ટોઇલેટના વિસ્તારમાં રાખવામાં આવ્યું અને ત્યાં ભોજન લેવાની ફરજ આ ખેલાડીઓને પાડવામાં આવી હતી. ખેલાડીઓને પર્યાપ્ત ખાવાનું પણ નહોતું મળ્યું. જે મળ્યું તે કાચું હતું, તેમાંથી વાસ આવતી હતી. 300થી વધુ લોકો માટે ભોજન તૈયાર કરવા માટે ફક્ત બે રસોઈયા જ રાખવામાં આવ્યા હતા. આ કિસ્સો પ્રકાશમાં આવ્યા પછી યુપી સરકારે તપાસના આદેશ આપ્યા છે અને બેદરકારી દાખવવાના આરોપમાં સહારનપુર જિલ્લાના સ્પોર્ટ્સ અધિકારીને સસ્પેન્ડ કર્યા છે. ખાવાનું બનાવનાર અને ખેલાડીઓને તે ઉપલબ્ધ કરાવનારા કોન્ટ્રેક્ટરને બ્લેક લિસ્ટ કરતાં ભવિષ્યમાં કામ નહીં કરવાની આકરી ચેતવણી આપવામાં આવી છે. સાથે જ રાજ્યના તમામ સ્પોર્ટ્સ અધિકારીઓને કડક ચેતવણી આપવામાં આવી છે કે, ખેલાડીઓને સુવિધા આપવામાં કોઈપણ પ્રકારની લાપરવાહી ચલાવી લેવામાં નહીં આવે. આ સમગ્ર ઘટના રમતોનાં આયોજન પર મોટા સવાલ કરે છે. જ્યારે રાજ્ય સ્તરની સ્પર્ધામાં ખેલાડીઓ પ્રતિ સ્પોર્ટ્સ અધિકારીઓમાં ઉદાસીનતા હોય તો જિલ્લા સ્તરનાં આયોજનોમાં શું થતું હશે? અધિકારીઓ ગમે તે કહે, પણ કેટલીક લોકપ્રિય રમતોને બાદ કરતાં જુનિયર સ્પર્ધાનાં આયોજનમાં ખેલાડીઓને એ સુવિધા નથી મળતી, જેના માટે તેઓ હકદાર છે. વાસ્તવમાં કન્યાઓને લગતાં આયોજનમાં ખાસ સાવચેતી વર્તવી જોઈએ, પરંતુ આયોજકો તેને જેમ તેમ પૂરી કરી દેવા માગતા હતા, અન્યથા શૌચાલય નજીક ભોજનસામગ્રી મૂકવા પર સૌથી પહેલાં વિરોધ તો તેમણે જ કરવો જોઈતો હતો. પોતાના બચાવમાં આયોજક હવે ભલે એ તર્ક આપે કે, ત્યાં ખરાબ ભાત રાખવામાં આવ્યા હતા, પણ ત્યાં અનાજ રાખવામાં શા માટે આવ્યું? સ્પોર્ટ્સ વિભાગના અધિકારીઓએ આ ઘટનાને ગંભીરતાથી લેવાની જરૂર છે. હવે કોઈપણ સ્પર્ધાનાં આયોજન પહેલાં એ સુનિશ્ચિત થવું જોઈએ કે, સ્ટેડિયમમાં કઈ કઈ સુવિધા છે. એવાં સ્ટેડિયમમાં કોઈ સ્પર્ધા જ નહીં થવી જોઈએ, જ્યાં રસોડાંની વ્યવસ્થા ન હોય. આ ઉપરાંત ખેલાડીઓના રહેવા અને શૌચાલયની વ્યવસ્થા પર પણ ધ્યાન આપવું જોઈએ. કબડ્ડી જેવી રમતોમાં સામાન્ય રીતે ગામડાઓના ખેલાડીઓ આવે છે, જે વિરોધ કે પ્રતિકાર નથી કરતા. આનો અર્થ એ નથી થતો કે, તેમના પ્રતિ બેદરકારી રાખવામાં આવે. સબ-જુનિયર અને જુનિયર સ્પોર્ટ્સમાં જો ખેલાડીઓને સન્માન હાંસલ થશે તો તેઓ બહેતર દેખાવના પ્રયાસ માટે પ્રેરિત થશે.