ભુજમાં પાર્કિંગ પ્લોટને દબાણ મુક્ત કરવા સુધરાઈ તંત્રને તાકીદ

ભુજ, તા. 28 : 2001માં આવેલા ભૂકંપને બે દાયકાનો સમય વીતવા આરે આવ્યો હોવા છતાં શહેર માટે શિરદર્દ સમાન બની ગયેલી પાર્કિંગ પ્લોટ મુદ્દે અરાજકતાની સ્થિતિ પ્રવર્તી રહી છે, ત્યારે કચ્છભરમાં પ્રકાશિત થયેલા અહેવાલ બાદ પ્રશાસન ફરી એકવાર હરકતમાં આવ્યું છે. પાર્કિંગ હેતુ અનામત રખાયેલા પ્લોટને વેળાસર દબાણમુક્ત કરવા માટેની કાર્યવાહી હાથ ધરવા ભાડા દ્વારા સુધરાઈ તંત્રેને તાકીદ કરવામાં આવી છે. ભાડાના મુખ્ય કારોબારી અધિકારી મનીષ ગુરવાણીએ જણાવ્યું કે, રિમાઇન્ડર સાથે નોટિસ પાઠવી પુન: પાર્કિંગ પ્લોટનું લિસ્ટ અને કેટલી જમીન આ માટેની અનામત રખાઈ તેની વિગતો આપવામાં આવી છે. બનતી ત્વરાએ પાર્કિંગ પ્લોટને દબાણમુક્ત કરવાની કાર્યવાહી કરવામાં નહીં આવે તો તમામ પ્લોટનો કબ્જો ભાડા પરત લઈ લેશે તેવી કડક શબ્દોમાં તાકીદ પણ કરવામાં આવી છે. ઉલ્લેખનીય છે કે પાર્કિંગ પ્લોટ ન હોવાના કારણે શહેરમાં ટ્રાફિકની સમસ્યા વકરતી હોવા છતાં કાયમી નિરાકરણ આજ દિવસ સુધી લવાતું નથી. 

Crime

© 2020 Saurashtra Trust

Developed & Maintain by Webpioneer