પોઝિટિવ દર્દીનાં નામ જાહેર ન કરવાની નીતિ સંક્રમણ વધારે તેવી ભીતિ

દયાપર, (તા. લખપત), તા. 17 : કોરોના મહામારીનો પંજો વિકરાળ બની રહ્યો છે, સંક્રમણની  સંખ્યા 1600 જેટલી પહોંચી ગઈ છે ત્યારે સતત બે મહિના સુધી કચ્છમાં ફકત બે પોઝિટિવ અને બાકીના ત્રણ મહિનામાં 1600નો આંકડો પહોંચ્યો ત્યારે લોકોમાં પણ હવે ગભરાટ ફેલાયો છે. વળી સરકારની માર્ગદર્શિકા વારંવાર બદલતા કોરોનાથી સંક્રમિત હવે કોઈ બાકી રહે તેવું લાગતું નથી.  રાજ્ય સરકારના નવા દિશાનિર્દેશ મુજબ કોરોના સંક્રમિત કે પોઝિટિવ આવનારી વ્યકિતનું નામ જાહેર કરવાનું નથી તો ખબર કેમ પડશે કે પોઝિટિવ વ્યકિત છે.  ત્યાં આજુબાજુ ન જવું કે તેના સંપર્કમાં ન આવવું. તબીબો એમ કહે છે કે પોઝિટિવ આવ્યા પછી સંક્રમિત વ્યકિતને  હોમ કવોરેન્ટાઈન હોવાથી તેને બહાર નીકળવાનું જ નથી. તેની આજુબાજુના રહેવાસીઓ પણ કન્ટેઈનમેન્ટ ઝોનમાં આવી જતાં ઘરમાં જ રહેવાનું હોય છે તેથી સંક્રમિત થવાનો સવાલ કયાં રહે છે ? પરંતુ આ દલીલ યોગ્ય નથી.  કારણ કે કવોરેન્ટાઈન થયેલા લોકો બેજવાબદારીપૂર્વક ગામની બજારોમાં ફરી રહ્યા છે. દયાપરમાં બે કેસ પોઝિટિવ હોવા છતાં એક જ કેસ જાહેર કરાયો તે પણ 4 દિવસ પછી ! ત્યાં સુધી તો કેટલાના સંપર્કમાં આ વ્યકિત આવી જાય ! આરોગ્યકર્મીઓ  પણ લાચાર છે. સરકારની ગાઈડલાઈન પ્રમાણે ચાલવાનું છે ! બીજી બાજુ કોઈ સંક્રમિત વ્યકિતએ કોર્ટમાં કેસ દાખલ કરીને  પોઝિટિવ દર્દીનું નામ જાહેર ન કરવા સરકારને મજબૂર કર્યા છે. લોકોમાં દહેશત છે કે નામ જાહેર ન થાય તો લોકો તે વ્યકિત કે વિસ્તારથી સચેત કેમ રહે ? આમ તો સંક્રમણ વધવાનું જ છે. પહેલાં તો વિસ્તારને સીલ કરાતા ત્યાં પોલીસકર્મીને ફરજ પર મુકાતો જેથી લોકો અંદરથી બહાર ન નીકળે અને બહારના લોકો અંદર ન આવે પરંતુ હવે આવું કંઈ રહ્યું નથી. કવોરેન્ટાઈન થયેલા લોકો જો ખુલ્લેઆમ બજારમાં ફરશે તો સંક્રમણ વધશે..! છેલ્લા 10 દિવસમાં 785 લોકોનું કોરોના ટેસ્ટિંગ થયું છે. પરંતુ તેમાં પોઝિટિવ અને નેગેટિવ કેસ કેટલા એ સ્થાનિકોને પણ ખબર નથી. આ સ્થિતિ ગંભીર હોવાનું ચર્ચાઈ રહ્યું છે. 

© 2020 Saurashtra Trust

Developed & Maintain by Webpioneer