બોલાય છે ત્યાં ભાષાને કોઈનોય ડર રાખવાની જરૂર નથી

જયદીપ જોશી દ્વારા-   ભુજ, તા. 20 : ભાષા એ કુદરત તરફથી માનવને મળેલી અમૂલ્ય બક્ષિસ છે જે દુનિયાના  અન્ય જીવોથી મનુષ્યને જુદો તારવે છે. તેમાંય માતૃભાષા એ માનવીની પ્રાદેશિક સંસ્કૃતિનું પ્રતિબિંબ છે. જેનો પડછાયો એ સમાજ પર પડે છે, જ્યાં તે શ્વસે છે. જ્યાં તેનું ઘડતર થાય છે. સમય બદલાયો તેમ પરિસ્થિતિ પણ બદલાતી ગઈ અને ભાષા પ્રત્યેના અભિપ્રાયો પણ બદલાતા ગયા. આજના દોડતા ભૌતિક યુગ સાથે તાલ મિલાવવા એક સક્ષમ  માધ્યમ તરીકે અંગ્રેજીનો સ્વીકાર આવકાર્ય છે, પણ સંસ્કૃતિના સંવર્ધન માટેનું જો કોઈ સબળ માધ્યમ હોય તો એ માત્ર ને માત્ર માતૃભાષા જ છે. તેવા ભિન્ન-ભિન્ન પણ મૂળે તો એક જ વાત કરતા માતૃભાષાનો મહિમા ગાતા લોકોના મંતવ્ય વિશ્વ માતૃભાષા દિવસ નિમિત્તે અહીં પ્રસ્તુત કર્યા છે. - માતૃભાષા દ્વારા સંસ્કૃતિનું સંવર્ધન : આર. આર. લાલન કોલેજમાં ગુજરાતી ભાષાના વિભાગાધ્યક્ષ પ્રો. ડો. પ્રવીણ રથવી માતૃભાષા વિશે વાત કરતાં જણાવે છે કે દરેક બાળકનું પ્રાથમિક શિક્ષણ માતૃભાષામાં જ થવું જોઈએ. એ તેનો બંધારણીય અધિકાર છે. ભાષા સાથે સંસ્કૃતિ  પણ જોડાયેલી હોવાથી માતૃભાષાનું પાયાનું શિક્ષણ સંસ્કૃતિ સંવર્ધન કરે છે. અંગ્રેજી ભાષાનો પ્રભાવ વધે છે તેની સાથે ગુજરાતી ભાષામાં ક્રિયાપદો પણ અંગ્રેજી ભાષાના આવી રહ્યા છે તે ચિંતાપ્રેરક છે. જો બાળક માતૃભાષામાં પ્રાથમિક શિક્ષણ લેશે તો તે અન્ય ભાષામાં શિક્ષણ મેળવનારા બાળક કરતાં વધારે એકાગ્ર અને ગ્રહણશીલ હોય છે. - માના દૂધ જેવી સમૃદ્ધ માતૃભાષા  : માતૃભાષા માટે વિદ્યાર્થીઓના વાલીઓને ચેતવાની જરૂર છે. ભુજની પોલીસ હેડકવાટર્સની શાળા નં. 7ના નિવૃત્ત શિક્ષિકા ધનલક્ષ્મીબેન રૂપારેલ જણાવતાં ચિંતા વ્યક્ત કરે છે કે, આજે બાળક માટે અંગ્રેજી જરૂરી છે, પણ માતૃભાષા એ તો માના દૂધ જેવી સમૃદ્ધ છે. બાળકોનો વિકાસ ઝડપથી થાય તે માટે માતૃભાષા જ અનિવાર્ય છે. માતૃભાષાની બારાક્ષરી ન આવડે તે કેમ ચાલે ? તેવું વર્ષો સુધી વિદ્યાર્થીઓને પાયાનું જ્ઞાન આપનારા શિક્ષિકા ચિંતા સાથે પૂછે છે.- ભાષાને ચાહનારો વિશાળ વર્ગ: રાપરની કોલેજના મદદનીશ પ્રાધ્યાપક પ્રો. ડો. રમજાન હસણિયા સ્પષ્ટ કહે છે કે, માતૃભાષા માટે બહુ ચિંતા કરવા જેવી નથી. તેના પાછળનું કારણ આપતાં કહે છે કે, આજે પરિસ્થિતિ જરૂર બદલાઈ છે પણ ભાષા જ્યાં સુધી બોલાય છે ત્યાં સુધી ડરવાની જરૂર નથી જ. સમાજનો બહુ મોટો વર્ગ હજુ શિક્ષણથી વંચિત હોવાથી તેમના માટે માતૃભાષા જ મહત્વની છે. માતૃભાષા લુપ્ત થાય છે તેવું જરાય ન વિચારાય કેમ કે ભાષાને ચાહનારો સમુદાય વિશાળ અને સમૃદ્ધ છે. તેથી ભાષા એ લોકોની છે તેમ લોકો માટે પણ માતૃભાષા પોતાની છે તેમ કહી વિશ્વ માતૃભાષા દિવસની સૌને શુભેચ્છા આપે છે. - માતૃભાષા એ વિચારની ભાષા : માતૃભાષા એ હાથ કરતાં પણ હાથવગી છે તેવું પુરુષોત્તમ વિદ્યાલય માનકૂવામાં ભાષા શિક્ષિકા તરીકે ફરજ બજાવતા જાગૃતિબેન ગુંસાઈ જણાવે છે. તેઓ આગળ જણાવે છે કે, માતૃભાષા એ વિચારની ભાષા છે. તેથી તે પોતીકી છે. ભાષાનું વ્યાકરણ વિશાળ હોવાથી શબ્દભંડોળની દ્રષ્ટિએ ભાષા ખૂબ જ  સમૃદ્ધ છે તેથી બાળકનું શિક્ષણ સમગ્રતયા નહીં તો પ્રાથમિક શિક્ષણ તો માતૃભાષામાં જ થવું જોઈએ તેમ તે જણાવે છે. - માતૃભાષા સૌથી સમૃદ્ધ ભાષા: માતૃભાષા એ શ્વાસની ભાષા છે તેવું કચ્છના સ્વામિનારાયણ વિદ્યાલયમાં ફરજ બજાવી ચૂકેલા અને હાલમાં નવયુગ વિનય મંદિરમાં આચાર્ય એવા કાંતિલાલ કોઠડિયા જણાવે છે.અન્ય ભાષાનું વળગણ છોડી માતૃભાષાને જે પહેલેથી સમૃદ્ધ છે તેને પુષ્કળ સમૃદ્ધ કરવા સૌની અનિવાર્ય જવાબદારી છે તેવું ઉમેરી માતૃભાષામાં જ શિક્ષણ લેવા શ્રી કોઠડિયા અનુરોધ કરે છે.  

© 2020 Saurashtra Trust

Developed & Maintain by Webpioneer