પેનલમાં ધડાકો થતાં ગાંધીધામમાં ત્રીજા દિવસેય સંચાર નિગમની સેવા ઠપ

ગાંધીધામ, તા. 12 : ભારે વરસાદના પગલે ગાંધીધામ સંકુલમાં ખોરવાયેલી સંચાર નિગમની સેવા આજે ત્રીજા દિવસે પણ ખોરવાયેલી રહેતાં લોકો ભારે મુશ્કેલીમાં મુકાયા હતા. શનિવારે સવારે બંધ થયેલી સેવા પૂર્વવત કરવા સંચાર નિગમ દ્વારા વ્યાપક વ્યાયામ આદર્યા બાદ ગઈકાલે વીજ ટ્રાન્સફોર્મર ઠપ થઈ જતાં પાવર સપ્લાય બંધ થયો હતો. ગઈકાલે મોડી સાંજે અને આજે બપોર સુધી વીજ તંત્રએ કામગીરી કરી હતી. સાંજે ટ્રાન્સફોર્મર શરૂ થયા બાદ વીજપુરવઠો શરૂ કરતાંની સાથે જ મુખ્ય પેનલમાં ધડાકો થતાં એક સાંધો ત્યાં તેર તૂટે જેવી હાલત સર્જાઈ હતી. હાલ સંચાર નિગમની ઈલેકટ્રીક વિભાગની ટીમ દ્વારા પેનલના સમારકામની કામગીરી કરાઈ છે. સંભવત: મોડી રાત્રે અથવા આવતીકાલે સવારે ફોન અને બ્રોડબેન્ડની સેવા પૂર્વવત થાય તેવી શકયતા નિગમના અધિકારી સૂત્રોએ વયક્ત કરી હતી. હાલ સંભવત: પેનલને બાયપાસ કરી સેવા પૂર્વવત કરવાના પ્રયાસો આદરાયા છે. જો કે, મોબાઈલ ફોન અને ઈન્ટરનેટ સેવા ચાલુ હોવાથી લોકોને રાહત થઈ છે.

© 2019 Saurashtra Trust

Developed & Maintain by Webpioneer