કેફીદ્રવ્ય સાથે જબ્બે પાકિસ્તાનીઓ રિમાન્ડમાં

ભુજ, તા. 24 : અબડાસાના મત્સ્ય બંદર જખૌ નજીકના દરિયામાંથી ચાર દિવસ પહેલાં ઝડપાયેલા કેફી દ્રવ્યના જથ્થાની કિંમત આંતરરાષ્ટ્રીય બજાર મુજબ એક હજાર કરોડ થતી હોવાનું સત્તાવાર રીતે સપાટીએ આવ્યું છે. ડ્રગ્સ માફિયાઓની ઇન્ટરનેશનલ સિન્ડીકેટને પાધરી કરવા માટે અત્યંત ગંભીરતા અને બારીકાઇ સાથે ચાલી રહેલી આ પ્રકરણની તપાસમાં બ્રાઉન હેરોઇન સહિતના 217.85 કિલોગ્રામ કેફીદ્રવ્યના જથ્થા સાથે ધરપકડ કરાયેલા સૂત્રધાર સહિતના તમામ છ પાકિસ્તાનીના આજે બે દિવસના રિમાન્ડ મેળવાયા હતા. જેની બાતમીના આધારે મધદરિયે ભારતીય તટરક્ષક દળ દ્વારા આ ઓપરેશન હાથ ધરાયું હતું તે ડાયરેકટોરેટ ઓફ રેવન્યુ ઇન્ટેલિજન્સ (ડી.આર.આઇ.) દ્વારા આ કેસની તપાસ પોતાના હસ્તક રખાઇ છે. આજે આ સુરક્ષા એજન્સી દ્વારા પકડાયેલા તમામ છ પાકિસ્તાનીને ભુજમાં રાત્રે ખાસ ન્યાયાધીશ એમ.એમ. પટેલ સમક્ષ રજૂ કરાયા હતા. એજન્સી અને તેના વતી ઉપસ્થિત રહેલા કેન્દ્ર સરકાર દ્વારા ખાસ નિયુકત સરકારી ધારાશાત્રી કલ્પેશભાઇ સી. ગોસ્વામીની  દલીલો ગ્રાહ્ય રાખી ન્યાયાધીશે આ છ ઇસમને આગામી સોમવાર સવાર સુધી બે દિનના રિમાન્ડ ઉપર લેવાનો હુકમ  કર્યો હતો.  ખાસ નિયુકત ધારાશાત્રી શ્રી ગોસ્વામી સાથે વાતચીત કરતાં તેમણે જણાવ્યું હતું કે તપાસનીશ એજન્સી રિમાન્ડ હેઠળની પૂછતાછમાં જેની પાસેથી જથ્થો લેવાયો તે બલૂચિસ્તાનની પાર્ટી ઉપરાંત ભારતીય જળસીમમાં માલની ડિલિવરી લેનારી પાર્ટી વિશે ઉપરાંત ભારતમાં આ જથ્થો કયાં લઇ જવાનો હતો તેના સહિતની ડ્રગ્સ માફિયાઓની સિન્ડીકેટ વિશેની કડીઓ પાધરી કરવાનો પ્રયાસ હાથ ધરશે. દરમ્યાન પકડાયેલા અને રિમાન્ડ ઉપર લેવાયેલા છ પાકિસ્તાનીમાં સિંધપ્રાંતના કંદર સહાદતના સદરઅલી અલવારાજી શેખ તથા તેના પાંચ સાગરીત પૂર્વ કરાચીનો અલા દાગ અલા બક્ષ, દક્ષિણ કરાચીનો અઝીમખાન ઉસ્માનખાન, બલૂચિસ્તાનનો અબ્દુલ્લગફ્નર સકી દાદ, દક્ષિણ કરાચીનો મોહમદ ઉર્સ અને મલદીર જિલ્લાના વતની અબ્દુલ્લ અઝીઝ મોહમદ જુમ્માનો સમાવેશ થાય છે. દરમ્યાન આ ડ્રગ્સકાંડની સત્તાવાર રીતે બહાર આવેલી વિગતો અનુસાર પકડાયેલા જથ્થામાં બ્રાઉન હેરોઇન સહિતના કેફીદ્રવ્યોનો સમાવેશ થાય છે. આ માલની કિંમત કિલોના પાંચ કરોડ રૂપિયા થાય છે. આ હિસાબે પકડાયેલો જથ્થો એક હજાર કરોડ રૂપિયાની કિંમતનો થવા જાય છે. કબજે કરાયેલા જથ્થાનું વજન 217.85 કિલો છે. કેફીદ્રવ્યનો મોટો જથ્થો પાકિસ્તાન બાજુથી ભારતીય જળસીમા તરફ આવી રહ્યો હોવાની ડી.આર.આઇ.ને ગત તા.20મીના બાતમી મળી હતી. આ પછી તટરક્ષક દળને ઇનપુટ અપાતા પાકિસ્તાનની અલમદીના બોટ સાથે સૂત્રધાર સહિતના છ આરોપી ઝડપાઇ ગયા હતા. સત્તાવાર સાધનોએ વધુમાં જણાવ્યું હતું કે સૂત્રધાર સદરઅલી શેખે ગત તા. 7મી મેના બલૂચિસ્તાન ખાતેથી આ અલમદીના બોટની ખરીદી કરી હતી. બાદમાં તેનું કરાચી ખાતે રજિસ્ટ્રેશન કરાવાયું હતું. તારીખ 10મી મેના કરાચી ખાતે કસ્ટમ કલીયરન્સ કરાવીને બલૂચિસ્તાન ખાતેથી ખરીદાયેલા કુલ્લ 330 કિલો કેફીદ્રવ્ય સાથે બોટ રવાના કરાઇ હતી. આ સમયે સૂત્રધાર સહિત કુલ્લ 11 ઇસમ બોટમાં સવાર હતા. પાકિસ્તાની જળસીમામાં ડિલિવરી લેવા માટે આવનારાની રાહ જોવાઇ હતી. પણ કોઇ ન આવતાં તા. 12થી 14 સુધી ઊભા રહ્યા બાદ આ બોટ પરત કરાચી લઇ જવાઇ હતી.  દરમ્યાન ગત તા. 20મીના સૂત્રધાર કેફીદ્રવ્યના 194 પેકેટ સાથે નીકળ્યો હતો અને ભારતીય જળસીમામાં ઘુસ્યા બાદ તેઓ ઝડપાઇ ગયા હતા. તેમની પાસેથી પાકિસ્તાની ચલણના રૂા. 47 હજાર ઉપરાંત પાંચ મોબાઇલ ફોન અને એક સ્માર્ટ ફોન તથા બોટ કબજે કરાયા હતા તેમ સાધનોએ ઉમેર્યું હતું.  

© 2019 Saurashtra Trust

Developed & Maintain by Webpioneer