અલીગઢમાં મોદીની સુરક્ષામાં મોટી ચૂક : મંચ નીચે આગ લાગી

અલીગઢ, તા. 14 : ઉત્તરપ્રદેશનાં અલીગઢમાં આજે વડાપ્રધાન નરેન્દ્ર મોદીની સુરક્ષામાં મોટી ચૂક થઈ હતી. નુમાઈશ મેદાનનાં જે મંચ ઉપરથી વડાપ્રધાન મોદીએ જનસભાને સંબોધી હતી એ મંચની નીચે શોટસર્કિટથી આગ લાગી ગઈ હતી. જેને પગલે અફરાતફરી અને ખળભળાટ સર્જાયો હતો. આ ઘટનાને પગલે ત્રણ સામે બેદરકારીનો કેસ નોંધીને તપાસ હાથ ધરી દેવામાં આવી છે. વડાપ્રધાન મોદી જ્યારે મંચ ઉપર હતાં ત્યારે જ મંચની નીચે સ્પાર્કિંગથી આગ ભડકી ગઈ હતી. જો કે આગ વધુ મોટી નહોતી. તત્કાળ સુરક્ષાકર્મીઓ દ્વારા આગને ઠારી નાખવામાં આવી હતી અને મોદીનો કાર્યક્રમ યથાવત ચાલુ રાખવામાં આવ્યો હતો.  જ્યારે  આગ લાગી ત્યારે મોદી પોતાનાં સમર્થકોનું અભિવાદન ઝીલી રહ્યા હતાં અને તેમણે હજી ભાષણ શરૂ કર્યુ નહોતું. એવું જાણવા મળ્યું હતું કે એક કૂતરું મંચની નીચે ઘૂસી ગયું હતું અને તેનાથી તાર કપાઈ ગયા હતાં. જેમાં તણખા ઝરતાં આગ લાગી ગઈ હતી. જેનો ધુમાડો બહાર નીકળતો પણ દેખાયો હતો.  

© 2019 Saurashtra Trust

Developed & Maintain by Webpioneer